ПАСХА. Последование заутрени, часов и обедницы

19 апреля 2020 года. Светлое Христово Воскресение

ПАСХА

Последование заутрени, часов и обедницы для домашнего (келейного) совершения

Возжигаем свечи и держим их в руках до хвалитных стихир.

Стихира, глас 6:

Воскресе́ние Твое́, Христе́ Спа́се, / А́нгели пою́т на небесе́х, / и нас на земли́ сподо́би / чи́стым се́рдцем / Тебе́ сла́вити. Трижды.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Тропарь, глас 5:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Стих 1: Да воскре́снет Бог, и расточа́тся врази́ Его́, / и да бежа́т от Лица́ Его́ ненави́дящии Его́.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 2: Я́ко исчеза́ет дым, да исче́знут, / я́ко та́ет воск от лица́ огня́. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 3: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 4: Сей день, его́же сотвори́ Госпо́дь, / возра́дуемся и возвесели́мся в онь. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Сла́ва Отцу́ и Сы́ну и Свято́му Ду́ху.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И ны́не и при́сно и во ве́ки веко́в. Ами́нь.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И паки:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Го́споди, поми́луй, 12.

Сла́ва, и ны́не:

Канон Пасхи

Песнь 1

Ирмо́с: Воскресе́ния день, просвети́мся, лю́дие; Па́сха, Госпо́дня Па́сха: от сме́рти бо к жи́зни и от земли́ к Небеси́ Христо́с Бог нас преведе́, побе́дную пою́щия.

Припев: Христо́с воскре́се из ме́ртвых.

Очи́стим чу́вствия, и у́зрим непристу́пным све́том Воскресе́ния Христа́ блиста́ющася, и ра́дуйтеся реку́ща я́сно да услы́шим, побе́дную пою́ще.

Христо́с воскре́се из ме́ртвых.

Небеса́ у́бо досто́йно да веселя́тся, земля́ же да ра́дуется, да пра́зднует же мир, ви́димый же весь и неви́димый: Христо́с бо воста́, весе́лие ве́чное.

Катава́сия: Воскресе́ния день, просвети́мся, лю́дие; Па́сха, Госпо́дня Па́сха: от сме́рти бо к жи́зни и от земли́ к Небеси́ Христо́с Бог нас преведе́, побе́дную пою́щия.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Песнь 3

Ирмо́с: Прииди́те, пи́во пие́м но́вое, не от ка́мене непло́дна чудоде́емое, но нетле́ния исто́чник, из гро́ба одожди́вша Христа́, в Не́мже утвержда́емся.

Христо́с воскре́се из ме́ртвых.

Ны́не вся испо́лнишася све́та, Не́бо же и земля́, и преиспо́дняя: да пра́зднует у́бо вся тварь воста́ние Христо́во, в Не́мже утвержда́ется.

Христо́с воскре́се из ме́ртвых.

Вчера́ спогребо́хся Тебе́, Христе́, совостаю́ днесь воскре́сшу Тебе́, сраспина́хся Тебе́ вчера́, Сам мя спросла́ви, Спа́се, во Ца́рствии Твое́м.

Катава́сия: Прииди́те, пи́во пие́м но́вое, не от ка́мене непло́дна чудоде́емое, но нетле́ния исто́чник, из гро́ба одожди́вша Христа́, в Не́мже утвержда́емся.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Ипакои́, глас 4

Предвари́вшия у́тро я́же о Мари́и, и обре́тшия ка́мень отвале́н от гро́ба, слы́шаху от А́нгела: во све́те присносу́щнем Су́щаго с ме́ртвыми что и́щете, я́ко челове́ка? Ви́дите гро́бныя пелены́, тецы́те и ми́ру пропове́дите, я́ко воста́ Госпо́дь, умертви́вый смерть; я́ко есть Сын Бо́га, спаса́ющаго род че­лове́ческий.

Песнь 4

Ирмо́с: На Боже́ственней стра́жи богоглаго́ливый Авваку́м да ста́нет с на́ми и пока́жет светоно́сна А́нгела, я́сно глаго́люща: днесь спасе́ние ми́ру, я́ко воскре́се Христо́с, я́ко всеси́лен.

Христо́с воскре́се из ме́ртвых.

Му́жеский у́бо пол, я́ко разве́рзый де́вственную утро́бу, яви́ся Христо́с; я́ко челове́к же, А́гнец нарече́ся; непоро́чен же, я́ко невку́сен скве́рны, на́ша Па́сха, и я́ко Бог и́стинен, соверше́н рече́ся.

Христо́с воскре́се из ме́ртвых.

Я́ко единоле́тный а́гнец, благослове́нный нам вене́ц Христо́с, во́лею за всех закла́н бысть, Па́сха чисти́тельная, и па́ки из гро́ба кра́сное пра́вды нам возсия́ Со́лнце.

Христо́с воскре́се из ме́ртвых.

Богооте́ц у́бо Дави́д пред се́нным ковче́гом скака́ше игра́я, лю́дие же Бо́жии святи́и, образо́в сбытие́ зря́ще, весели́мся боже́ственне, я́ко воскре́се Христо́с, я́ко всеси́лен.

Катава́сия: На Боже́ственней стра́жи богоглаго́ливый Авваку́м да ста́нет с на́ми и пока́жет светоно́сна А́нгела, я́сно глаго́люща: днесь спасе́ние ми́ру, я́ко воскре́се Христо́с, я́ко всеси́лен.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Песнь 5

Ирмо́с: У́тренюем у́треннюю глубоку́, и вме́сто ми́ра песнь принесе́м Влады́це, и Христа́ у́зрим, пра́вды Со́лнце, всем жизнь возсия́юща.

Христо́с воскре́се из ме́ртвых.

Безме́рное Твое́ благоутро́бие а́довыми у́зами содержи́мии зря́ще, к све́ту идя́ху, Христе́, весе́лыми нога́ми, Па́сху хва́ляще ве́чную.

Христо́с воскре́се из ме́ртвых.

Присту́пим, свещено́снии, исходя́щу Христу́ из гро́ба я́ко Жениху́, и спра́зднуим любопра́зднственными чи́нми Па́сху Бо́жию спаси́тельную.

Катава́сия: У́тренюем у́треннюю глубоку́, и вме́сто ми́ра песнь принесе́м Влады́це, и Христа́ у́зрим, пра́вды Со́лнце, всем жизнь возсия́юща.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Песнь 6

Ирмо́с: Снизше́л еси́ в преиспо́дняя земли́, и сокруши́л еси́ вереи́ ве́чныя, содержа́щия свя́занныя, Христе́, и тридне́вен, я́ко от ки́та Ио́на, воскре́сл еси́ от гро́ба.

Христо́с воскре́се из ме́ртвых.

Сохрани́в це́ла зна́мения, Христе́, воскре́сл еси́ от гро́ба, ключи́ Де́вы не вреди́вый в рождестве́ Твое́м, и отве́рзл еси́ нам ра́йския две́ри.

Христо́с воскре́се из ме́ртвых.

Спа́се мой, живо́е же и неже́ртвенное заколе́ние, я́ко Бог Сам Себе́ во́лею приве́д Отцу́, совоскреси́л еси́ всеро́днаго Ада́ма, воскре́с от гро́ба.

Катава́сия: Снизше́л еси́ в преиспо́дняя земли́, и сокруши́л еси́ вереи́ ве́чныя, содержа́щия свя́занныя, Христе́, и тридне́вен, я́ко от ки́та Ио́на, воскре́сл еси́ от гро́ба.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Конда́к, глас 8:

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́, я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

И́кос

Е́же пре́жде со́лнца Со́лнце, заше́дшее иногда́ во гроб, предвари́ша ко у́тру и́щущия я́ко дне мироно́сицы де́вы, и друга́ ко друзе́й вопия́ху: о други́ни, прииди́те, воня́ми пома́жем Те́ло живоно́сное и погребе́нное, плоть Воскреси́вшаго па́дшаго Ада́ма, лежа́щую во гро́бе. И́дем, потщи́мся, я́коже волсви́, и поклони́мся, и принесе́м ми́ра я́ко да́ры, не в пелена́х, но в плащани́це обви́тому, и пла́чим, и возопии́м: о Влады́ко, воста́ни, па́дшим подая́й воскресе́ние.

Та́же:

Воскресе́ние Христо́во ви́девше, поклони́мся Свято́му Го́споду Иису́су, еди́ному Безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты́ бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те, вси ве́рнии, поклони́мся свято́му Христо́ву Воскресе́нию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́. Трижды.

Воскре́с Иису́с от гро́ба, я́коже прорече́, даде́ нам живо́т ве́чный и ве́лию ми́лость. Трижды.

Песнь 7

Ирмо́с: О́троки от пе́щи изба́вивый, быв Челове́к, стра́ждет я́ко сме́ртен, и Cтра́стию сме́ртное в нетле́ния облачи́т благоле́пие, еди́н благослове́н отце́в Бог и препросла́влен.

Христо́с воскре́се из ме́ртвых.

Жены́ с ми́ры богому́дрыя в след Тебе́ теча́ху, Его́же я́ко ме́ртва со слеза́ми иска́ху, поклони́шася ра́дующияся Живо́му Бо́гу и Па́сху та́йную Твои́м, Христе́, ученико́м благовести́ша.

Христо́с воскре́се из ме́ртвых.

Сме́рти пра́зднуем умерщвле́ние, а́дово разруше́ние, ино́го жития́ ве́чнаго нача́ло, и игра́юще пое́м Вино́внаго, еди́наго благослове́ннаго отце́в Бо́га и препросла́вленнаго.

Христо́с воскре́се из ме́ртвых.

Я́ко вои́стину свяще́нная и всепра́зднственная сия́ спаси́тельная нощь, и светоза́рная, светоно́снаго дне воста́ния су́щи провозве́стница: в не́йже безле́тный Свет из гро́ба пло́тски всем возсия́.

Катава́сия: О́троки от пе́щи изба́вивый, быв Челове́к, стра́ждет я́ко сме́ртен, и Cтра́стию сме́ртное в нетле́ния облачи́т благоле́пие, еди́н благослове́н отце́в Бог и препросла́влен.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Песнь 8

Ирмо́с: Сей нарече́нный и святы́й день, еди́н суббо́т царь и госпо́дь, пра́здников пра́здник и торжество́ есть торже́ств: во́ньже благослови́м Христа́ во ве́ки.

Христо́с воскре́се из ме́ртвых.

Прииди́те, но́ваго виногра́да рожде́ния, Боже́ственнаго весе́лия, в наро́читом дни Воскресе́ния, Ца́рствия Христо́ва приобщи́мся, пою́ще Его́ я́ко Бо́га во ве́ки.

Христо́с воскре́се из ме́ртвых.

Возведи́ о́крест о́чи твои́, Сио́не, и виждь: се́ бо приидо́ша к тебе́, я́ко богосве́тлая свети́ла, от за́пада, и се́вера, и мо́ря, и восто́ка ча́да твоя́, в тебе́ благословя́щая Христа́ во ве́ки.

Пресвята́я Тро́ице, Бо́же наш, сла́ва Тебе́.

О́тче Вседержи́телю, и Сло́ве, и Ду́ше, треми́ соединя́емое во Ипоста́сех Естество́, Пресу́щественне и Пребоже́ственне, в Тя крести́хомся и Тя благослови́м во вся ве́ки.

Катава́сия: Сей нарече́нный и святы́й день, еди́н суббо́т царь и госпо́дь, пра́здников пра́здник и торжество́ есть торже́ств: во́ньже благослови́м Христа́ во ве́ки.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Припев:

Вели́чит душа́ моя́ воскре́сшаго тридне́вно от гро́ба, Христа́ Жизнода́вца.

Песнь 9

Ирмо́с: Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.

Припевы: Вели́чит душа́ моя́ во́лею страда́вша, и погребе́нна, и воскре́сшаго тридне́вно от гро́ба.

Христо́с но́вая Па́сха, же́ртва жива́я, А́гнец Бо́жий, взе́мляй грехи́ ми́ра.

А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба, и ме́ртвыя воздви́гнувый: лю́дие, весели́теся.

Возбуди́л еси́, усну́в, ме́ртвыя от ве́ка, ца́рски рыка́вый я́ко от Иу́ды лев.

Магдали́на Мари́я притече́ ко гро́бу, и Христа́ ви́девши, я́ко вертогра́даря вопроша́ше.

А́нгел облиста́яй жена́м вопия́ше: преста́ните от слез, я́ко Христо́с вос­кре́се.

О Боже́ственнаго, о любе́знаго, о сладча́йшаго Твоего́ гла́са! С на́ми бо нело́жно обеща́лся еси́ бы́ти до сконча́ния ве́ка, Христе́: Его́же, ве́рнии, утвержде́ние наде́жды иму́ще, ра́дуемся.

Припевы: Христо́с воскре́се, смерть попра́вый и ме́ртвыя воздви́гнувый: лю́дие, весели́теся.

Днесь вся́ка тварь весели́тся и ра́дуется, я́ко Христо́с воскре́се и ад плени́ся.

Днесь Влады́ка плени́ а́да, воздви́гнувый ю́зники, я́же от ве́ка имя́ше лю́те одержи́мыя.

Вели́чит душа́ моя́ Триипоста́снаго и Неразде́льнаго Божества́ держа́ву.

Ра́дуйся, Де́во, ра́дуйся, ра́дуйся, Благослове́нная, ра́дуйся, Препросла́вленная: Твой бо Сын воскре́се тридне́вен от гро́ба.

О Па́сха ве́лия и свяще́ннейшая, Христе́! О му́дросте, и Сло́ве Бо́жий, и си́ло! Подава́й нам и́стее Тебе́ причаща́тися в невече́рнем дни Ца́рствия Твоего́.

Вели́чит душа́ моя́ во́лею страда́вша, и погребе́нна, и воскре́сшаго тридне́вно от гро́ба.

Катава́сия: Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Ексапостила́рий:

Пло́тию усну́в, я́ко мертв, Царю́ и Го́споди, тридне́вен воскре́сл еси́, Ада́ма воздви́г от тли, и упраздни́в смерть: Па́сха нетле́ния, ми́ра спасе́ние. Трижды.

Хвали́тны

Глас 1:

Вся́кое дыха́ние да хва́лит Го́спода. Хвали́те Го́спода с небе́с, хвали́те Его́ в вы́шних. Тебе́ подоба́ет песнь Бо́гу. Хвали́те Его́, вси А́нгели Его́, хвали́те Его́, вся Си́лы Его́. Тебе́ подоба́ет песнь Бо́гу.

На 4: Хвали́те Его́ на си́лах Его́, хвали́те Его́ по мно́жеству вели́чествия Его́.

Пое́м Твою́, Христе́, спаси́тельную страсть, и сла́вим Твое́ Воскресе́ние.

Хвали́те Его́ во гла́се тру́бнем, хвали́те Его́ во псалти́ри и гу́слех.

Крест претерпе́вый, и смерть упраздни́вый, и воскресы́й из ме́ртвых, умири́ на́шу жизнь, Го́споди, я́ко Еди́н Всеси́лен.

Хвали́те Его́ в тимпа́не и ли́це, хвали́те Его́ во стру́нах и орга́не.

А́да плени́вый и челове́ка воскреси́вый, Воскресе́нием Твои́м, Христе́, сподо́би ны чи́стым се́рдцем, Тебе́ пе́ти и сла́вити.

Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Боголе́пное Твое́ снизхожде́ние сла́вяще, пое́м Тя, Христе́: роди́лся еси́ от Де́вы, и неразлуче́н был еси́ от Отца́: пострада́л еси́ я́ко челове́к, и во́лею претерпе́л еси́ Крест, воскре́сл еси́ от гро́ба я́ко от черто́га произше́д, да спасе́ши мир, Го́споди, сла́ва Тебе́.

Стихиры Пасхи, глас 5:

Стих: Да воскре́снет Бог, и расточа́тся врази́ Его́.

Па́сха свяще́нная нам днесь показа́ся: Па́сха но́ва свята́я, Па́сха та́инственная, Па́сха всечестна́я, Па́сха, Христо́с Изба́витель, Па́сха непоро́чная, Па́сха вели́кая, Па́сха ве́рных, Па́сха, две́ри ра́йския нам отверза́ющая, Па́сха, всех освяща́ющая ве́рных.

Стих: Я́ко исчеза́ет дым, да исче́знут.

Прииди́те от виде́ния, жены́ благове́стницы, и Сио́ну рцы́те: приими́ от нас ра́дости благове́щения Воскресе́ния Христо́ва; красу́йся, лику́й и ра́дуйся, Иерусали́ме, Царя́ Христа́ узре́в, из гро́ба, я́ко Жениха́, происходя́ща.

Стих: Та́ко да поги́бнут гре́шницы от лица́ Бо́жия, а пра́ведницы да возвеселя́тся.

Мироно́сицы жены́, у́тру глубоку́, предста́вша гро́бу Живода́вца, обрето́ша А́нгела, на ка́мени седя́ща, и той, провеща́в им, си́це глаго́лаше: что и́щете Жива́го с ме́ртвыми? Что пла́чете Нетле́ннаго во тли? Ше́дше, пропове́дите ученико́м Его́.

Стих: Сей день, его́же сотвори́ Госпо́дь, возра́дуемся и возвесели́мся вонь.

Па́сха кра́сная, Па́сха, Госпо́дня Па́сха, Па́сха всечестна́я нам возсия́. Па́сха, ра́достию друг дру́га обы́мем. О Па́сха! Избавле́ние ско́рби, и́бо из гро́ба днесь, я́ко от черто́га возсия́в, Христо́с жены́ ра́дости испо́лни, глаго́ля: пропове́дите апо́столом.

Сла́ва, и ны́не:

Воскресе́ния день, и просвети́мся торжество́м, и друг дру́га обы́мем; рцем: бра́тие, и ненави́дящим нас прости́м вся Воскресе́нием, и та́ко возопии́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Та́же:

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

И после пения стихир Пасхи христосуемся друг с другом

И читаем Огласительное слово свт. Иоанна Златоуста.

Иже во святых отца нашего Иоанна, Архиепископа Константинопольскаго, Златоустаго, слово Огласительное во святый и светоносный день преславнаго и спасительнаго Христа Бога нашего Воскресения.

А́ще кто благочести́в и боголюби́в, да наслади́тся сего́ до́браго и све́тлаго торжества́. А́ще кто раб благоразу́мный, да вни́дет ра́дуяся в ра́дость Го́спода своего́. А́ще кто потруди́ся постя́ся, да восприи́мет ны́не дина́рий. А́ще кто от пе́рваго часа́ де́лал есть, да прии́мет днесь пра́ведный долг. А́ще кто по тре́тием часе́ прии́де, благодаря́ да пра́зднует. А́ще кто по шесто́м часе́ дости́же, ничто́же да сумни́тся, и́бо ничи́мже отщетева́ется. А́ще кто лиши́ся и девя́таго часа́, да присту́пит, ничто́же сумня́ся, боя́ся. А́ще кто то́чию дости́же, и во единонадеся́тый час, да не устраши́тся замедле́ния: любочести́в бо Сый Влады́ка, прие́млет после́дняго я́коже и пе́рваго: упокоева́ет в единонадеся́тый час прише́дшаго, я́коже де́лавшаго от пе́рваго часа́. И после́дняго ми́лует, и пе́рвому угожда́ет, и о́ному дае́т, и сему́ да́рствует, и дела́ прие́млет, и наме́рение целу́ет, и дея́ние почита́ет, и предложе́ние хва́лит. Те́мже у́бо вни́дите вси в ра́дость Го́спода своего́: и пе́рвии и втори́и, мзду приими́те. Бога́тии и убо́зии, друг со дру́гом лику́йте. Возде́ржницы и лени́вии, день почти́те. Пости́вшиися и непости́вшиися, возвесели́теся днесь. Трапе́за испо́лнена, наслади́теся вси. Теле́ц упита́нный, никто́же да изы́дет а́лчай, вси наслади́теся пи́ра ве́ры: вси восприими́те бога́тство бла́гости. Никто́же да рыда́ет убо́жества, яви́ся бо о́бщее Ца́рство. Никто́же да пла́чет прегреше́ний, проще́ние бо от гро́ба возсия́. Никто́же да убои́тся сме́рти, свободи́ бо нас Спа́сова смерть. Угаси́ ю́, И́же от нея́ держи́мый. Плени́ а́да, Соше́дый во ад. Огорчи́ его́ вкуси́вша пло́ти Его́. И сие́ предприе́мый Иса́иа возопи́: ад, глаго́лет, огорчи́ся, срет Тя до́ле. Огорчи́ся, и́бо упраздни́ся. Огорчи́ся, и́бо пору́ган бысть. Огорчи́ся, и́бо умертви́ся. Огорчи́ся, и́бо низложи́ся. Огорчи́ся, и́бо связа́ся. Прия́т те́ло, и Бо́гу прирази́ся. Прия́т зе́млю, и сре́те Не́бо. Прия́т е́же ви́дяше, и впаде́ во е́же не ви́дяше. Где твое́, сме́рте, жа́ло; где твоя́, а́де, побе́да? Воскре́се Христо́с, и ты низве́рглся еси́. Воскре́се Христо́с, и падо́ша де́мони. Воскре́се Христо́с, и ра́дуются А́нгели. Воскре́се Христо́с, и жизнь жи́тельствует. Воскре́се Христо́с, и ме́ртвый ни еди́н во гро́бе. Христо́с бо воста́в от ме́ртвых, Нача́ток усо́пших бысть. Тому́ сла́ва и держа́ва, во ве́ки веко́в. Ами́нь.

Тропарь святаго Иоанна, глас 8:

Уст твои́х, я́коже све́тлость огня́ / возсия́вши, благода́ть вселе́нную просвети́: / не сребролю́бия ми́рови сокро́вища сниска́, / высоту́ нам смиреному́дрия показа́, / но твои́ми словесы́ наказу́я, о́тче Иоа́нне Златоу́сте, / моли́ Сло́ва, Христа́ Бо́га, спасти́ся душа́м на́шим.

Го́споди, поми́луй. 40.

Сла́ва, и ны́не:

Го́споди, поми́луй. 12.

Сла́ва, и ны́не:

Утверди́, Бо́же, святу́ю правосла́вную ве́ру правосла́вных христиа́н во век ве́ка.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Отпу́ст

Христе́, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бо́же наш, моли́твами Пречи́стыя Твоея́ Ма́тере и всех святы́х, поми́луй и спаси́ нас, я́ко Благ и Человеколю́бец. Аминь.

Христос Воскресе! Воистину Воскресе!

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

И нам дарова́ живо́т ве́чный, покланя́емся Его́ тридне́вному Воскресе́нию.

Вели́каго господи́на и отца́ на́шего Кири́лла, / Святе́йшаго Патриа́рха Моско́вскаго и всея́ Руси́, / и господи́на на́шего высокопреосвяще́ннейшаго и́мярек, / митрополи́та [или́: архиепи́скопа; или́: преосвяще́ннейшаго и́мярек, епи́скопа] [его́же есть о́бласть], / настоя́теля, бра́тию и прихо́жан свята́го хра́ма на́шего, / домоча́дцы на́ша и вся правосла́вныя христиа́ны, / Го́споди, сохрани́ их на мно́гая ле́та.

Та́же:

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

И последование пасхальнаго часа.

ЧАСЫ СВЯТЫЯ ПАСХИ

Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас. Ами́нь.

Тропа́рь, глас 5

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Воскресе́ние Христо́во ви́девше, поклони́мся Свято́му Го́споду Иису́су, еди́ному Безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты́ бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те, вси ве́рнии, поклони́мся свято́му Христо́ву Воскресе́нию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́. Трижды.

Ипакои́, глас 4

Предвари́вшия у́тро я́же о Мари́и, и обре́тшия ка́мень отвале́н от гро́ба, слы́шаху от А́нгела: во све́те присносу́щнем Су́щаго с ме́ртвыми что и́щете, я́ко челове́ка? Ви́дите гро́бныя пелены́, тецы́те и ми́ру пропове́дите, я́ко воста́ Госпо́дь, умертви́вый смерть; я́ко есть Сын Бо́га, спаса́ющаго род че­лове́ческий.

Конда́к, глас 8

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

Во гро́бе пло́тски, во а́де же с душе́ю я́ко Бог, в раи́ же с разбо́йником, и на Престо́ле был еси́, Христе́, со Отце́м и Ду́хом, вся исполня́яй, Неопи́санный.

Сла́ва:

Я́ко живоно́сец, я́ко рая́ красне́йший, вои́стину и черто́га вся́каго ца́рскаго показа́ся светле́йший, Христе́, гроб Твой, исто́чник на́шего воскресе́ния.

И ны́не:

Вы́шняго освяще́нное Боже́ственное селе́ние, ра́дуйся. Тобо́ю бо даде́ся ра́дость, Богоро́дице, зову́щим: благослове́нна Ты в жена́х еси́, всенепоро́чная Влады́чице.

Го́споди, поми́луй. 40.

Сла́ва, и ны́не:

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас. Ами́нь.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Сла́ва, и ны́не:

Го́споди, поми́луй. Трижды.

Отпу́ст

Воскресы́й из ме́ртвых, Христе́, и́стинный Бо́же наш, моли́твами Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй и спаси́ нас, я́ко Благ и Человеколю́бец. Ами́нь.

ОБЕДНИЦА

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Антифон первый, псалом 65, глас 2:

Стих 1: Воскли́кните Го́сподеви вся земля́.

Припев: Моли́твами Богоро́дицы,  Спа́се спаси́ нас.

То́йже стих: Воскли́кните Го́сподеви вся земля́,  по́йте же и́мени Его́, дади́те сла́ву хвале́ Его́.

Припев: Моли́твами Богоро́дицы,  Спа́се спаси́ нас.

Стих 2: Рцы́те Бо́гу: коль стра́шна дела́ Твоя́,  во мно́жестве си́лы Твоея́ со́лжут Тебе́ врази́ Твои́.

Припев: Моли́твами Богоро́дицы,  Спа́се спаси́ нас.

Стих 3: Вся земля́ да покло́нится Тебе́,  и пое́т Тебе́, да пое́т же и́мени Твоему́ Вы́шний.

Припев: Моли́твами Богоро́дицы,  Спа́се спаси́ нас.

Сла́ва Отцу́ и Сы́ну и Свято́му Ду́ху,  и ны́не и при́сно и во ве́ки веко́в. Ами́нь.

Припев: Моли́твами Богоро́дицы,  Спа́се спаси́ нас.

Антифон вторый, псалом 66, глас тойже:

Стих 1: Бо́же уще́дри ны и благослови́ ны.

Припев: Спаси́ ны, Сы́не Бо́жий,  воскресы́й из ме́ртвых, пою́щия Ти:  Аллилу́иа. Единожды.

То́йже стих: Бо́же, уще́дри ны и благослови́ ны,  просвети лице Твое́ на ны и поми́луй ны.

Припев: Спаси́ ны, Сы́не Бо́жий,  воскресы́й из ме́ртвых, пою́щия Ти:  Аллилу́иа. Единожды.

Стих 2: Да позна́ем на земли́ путь Твой,  во всех язы́цех спасе́ние Твое́.

Припев: Спаси́ ны, Сы́не Бо́жий,  воскресы́й из ме́ртвых, пою́щия Ти:  Аллилу́иа. Единожды.

Стих 3: Да испове́дятся Тебе́ лю́дие, Бо́же,  да испове́дятся Тебе́ лю́дие вси.

Припев: Спаси́ ны, Сы́не Бо́жий,  воскресы́й из ме́ртвых, пою́щия Ти:  Аллилу́иа. Единожды.

Сла́ва Отцу́ и Сы́ну и Свято́му Ду́ху,  и ны́не и при́сно и во ве́ки веко́в. Ами́нь.

Единоро́дный Сы́не и Сло́ве Бо́жий, Безсме́ртен Сый, и изво́ливый спасе́ния на́шего ра́ди воплоти́тися от святы́я Богоро́дицы и Присноде́вы Мари́и, непрело́жно вочелове́чивыйся, распны́йся же, Христе́ Бо́же, сме́ртию смерть попра́вый, Еди́н Сый Святы́я Тро́ицы, спрославля́емый Отцу́ и Свято́му Ду́ху, спаси́ нас.

Антифон 3-й, псалом 67, глас 5:

Стих 1: Да воскре́снет Бог и расточа́тся врази́ Его́.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

То́йже стих: Да воскре́снет Бог и расточа́тся врази́ Его́, и да бежа́т от лица́ Его́ ненави́дящии Его́.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Стих 2: Я́ко исчеза́ет дым, да исче́знут, я́ко та́ет воск от лица́ огня́.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Стих 3: Та́ко да поги́бнут гре́шницы от лица́ Бо́жия, а пра́ведницы да возвеселя́тся, да возра́дуются пред Бо́гом.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Ипакои́, глас 4

Предвари́вшия у́тро я́же о Мари́и, и обре́тшия ка́мень отвале́н от гро́ба, слы́шаху от А́нгела: во све́те присносу́щнем Су́щаго с ме́ртвыми что и́щете, я́ко челове́ка? Ви́дите гро́бныя пелены́, тецы́те и ми́ру пропове́дите, я́ко воста́ Госпо́дь, умертви́вый смерть; я́ко есть Сын Бо́га, спаса́ющаго род че­лове́ческий.

Сла́ва, и ны́не:

Конда́к, глас 8

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

Апостол и Евангелие

Прокимен, глас 8: Сей день, его́же сотвори́ Госпо́дь, возра́дуемся и возвесели́мся вонь.

Стих: Испове́дайтеся Го́сподеви, я́ко благ, я́ко в век ми́лость Его́.

Сей день, его́же сотвори́ Госпо́дь, возра́дуемся и возвесели́мся вонь.

Дея́ний святы́х Апо́стол чте́ние.

Деяния святых Апостол, зачало 1:

Пе́рвое у́бо сло́во сотвори́х о всех, о Фео́филе, я́же нача́т Иису́с твори́ти же и учи́ти. Да́же до дне, во́ньже, запове́дав Апо́столом Ду́хом Святы́м, и́хже избра́, вознесе́ся. Пред ни́миже и поста́ви Себе́ жи́ва по страда́нии Свое́м, во мно́зех [и́стинных] зна́мениих, де́ньми четы́редесятьми явля́яся им, и глаго́ля я́же о Ца́рствии Бо́жии: С ни́миже и яды́й, повеле́ им от Иерусали́ма не отлуча́тися, но жда́ти обетова́ния О́тча, е́же слы́шасте от Мене́: я́ко Иоанн у́бо крести́л есть водо́ю, вы же и́мате крести́тися Ду́хом Святы́м, не по мно́зех сих днех. Они́ же у́бо соше́дшеся, вопроша́ху Его́, глаго́люще: Го́споди, а́ще в ле́то сие́ устроя́еши ца́рствие Изра́илево? Рече́ же к ним: несть ва́ше разуме́ти времена́ и ле́та, я́же Оте́ц положи́ во Свое́й вла́сти: Но прии́мете си́лу, наше́дшу Свято́му Ду́ху на вы, и бу́дете Ми свиде́тели во Иерусали́ме же и во всей Иуде́и и Самари́и, и да́же до после́дних земли́.

Аллилу́ия, аллилу́ия, аллилу́ия.

Стих: Ты воскре́с, уще́дриши Сио́на.

Аллилу́ия, аллилу́ия, аллилу́ия.

Стих: Госпо́дь с небесе́ на зе́млю призре́.

Аллилу́ия, аллилу́ия, аллилу́ия.

Го́споди, поми́луй. Трижды.

От Иоа́нна свята́го Ева́нгелия чте́ние.

Сла́ва Тебе́, Го́споди, сла́ва Тебе́.

Евангелие от Иоанна, зачало 1:

В нача́ле бе Сло́во, и Сло́во бе к Бо́гу, и Бог бе Сло́во. Сей бе искони́ к Бо́гу. Вся Тем бы́ша, и без Него́ ничто́же бысть, е́же бысть. В Том живо́т бе, и живо́т бе свет челове́ком. И свет во тьме све́тится, и тьма его́ не объят. Бысть челове́к по́слан от Бо́га, и́мя ему́ Иоа́нн. Сей прии́де во свиде́тельство, да свиде́тельствует о Све́те, да вси ве́ру и́мут Ему́. Не бе той свет, но да свиде́тельствует о Све́те. Бе Свет и́стинный, И́же просвеща́ет вся́каго челове́ка гряду́щаго в мир. В ми́ре бе, и мир Тем бысть, и мир Его́ не позна́. Во своя́ прии́де, и свои́ Его́ не прия́ша. Ели́цы же прия́ша Его́, даде́ им о́бласть ча́дом Бо́жиим бы́ти, ве́рующим во и́мя Его́. И́же не от кро́ве, ни от по́хоти плотски́я, ни от по́хоти му́жеския, но от Бо́га роди́шася. И Сло́во плоть бысть, и всели́ся в ны, и ви́дехом сла́ву Его́, сла́ву я́ко Единоро́днаго от Отца́, испо́лнь благода́ти и и́стины. Иоа́нн свиде́тельствует о Нем и воззва́, глаго́ля: Сей бе, Его́же рех, И́же по мне Гряды́й, пре́до мно́ю бысть, я́ко пе́рвее мене́ бе. И от исполне́ния Его́ мы вси прия́хом, и благода́ть воз благода́ть: Я́ко зако́н Моисе́ом дан бысть, благода́ть же и и́стина Иису́с Христо́м бысть.

Сла́ва Тебе́, Го́споди, сла́ва Тебе́.

Помяни́ нас, Го́споди, егда́ прии́деши во Ца́рствии Твое́м.

Помяни́ нас, Влады́ко, егда́ прии́деши во Ца́рствии Твое́м.

Помяни́ нас, Святы́й, егда́ прии́деши во Ца́рствии Твое́м.

Лик Небе́сный поет Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Стих: Приступи́те к Нему́ и просвети́теся, и ли́ца ва́ша не постыдя́тся.

Лик Небе́сный поет Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Слава: Лик святы́х А́нгел и Арха́нгел со все́ми Небе́сными Си́лами пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

И ныне: Ве́рую во еди́наго Бо́га Отца́, Вседержи́теля, Творца́ Не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с Небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны́ при Понти́йстем Пила́те, и страда́вша, и погребе́нна. И воскре́сшаго в тре́тий день, по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но Креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Осла́би, оста́ви, прости́, Бо́же, прегреше́ния на́ша, во́льная и нево́льная, я́же в сло́ве и в де́ле, я́же в ве́дении и не в ве́дении, я́же во дни́ и в нощи́, я́же во уме́ и в помышле́нии: вся нам прости́, я́ко Благ и Человеколю́бец.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Конда́к, глас 8

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

Сла́ва, и ны́не:

Вы́шняго освяще́нное Боже́ственное селе́ние, ра́дуйся. Тобо́ю бо даде́ся ра́дость, Богоро́дице, зову́щим: благослове́нна Ты в жена́х еси́, всенепоро́чная Влады́чице.

Го́споди, поми́луй. 40.

Еди́н свят, еди́н Госпо́дь Иису́с Христо́с, во сла́ву Бо́га Отца́. Ами́нь.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Псалом 33:

Благословлю́ Го́спода на вся́кое вре́мя, вы́ну хвала́ Его́ во усте́х мои́х.
О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю, и вознесе́м и́мя Его́ вку́пе. Взыска́х Го́спода, и услы́ша мя, и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и́, и от всех скорбе́й его́ спасе́ и́. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щимся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла и сотвори́ бла́го, взыщи́ ми́ра и пожени́ и́. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегреша́т. Изба́вит Госпо́дь ду́ши раб Свои́х, и не прегреша́т вси упова́ющии на Него́.

А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба, и ме́ртвыя воздви́гнувый: лю́дие, весели́теся.

Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.

Сла́ва, и ны́не:

Го́споди, поми́луй. Трижды. Благослови́.

Отпу́ст

Христе́, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бо́же наш, моли́твами Пречи́стыя Твоея́ Ма́тере и всех святы́х, поми́луй и спаси́ нас, я́ко Благ и Человеколю́бец. Ами́нь.

Христос Воскресе! Воистину Воскресе!

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

И нам дарова́ живо́т ве́чный, покланя́емся Его́ тридне́вному Воскресе́нию.