Акафист

Тропарь, глас 4

Почерпем, человецы, цельбы душам и телесем молитвою, река бо всем предтечет — Пречистая Царица Богородица, источающи нам чудную воду и измывающи сердец черности, греховныя струпы очищающи, души же освящающи верных Божественною благодатию.

Кондак, глас 8

От неистощимыя Ты, Источниче Богоблагодатный, подаеши ми, точащи воды Твоея благодати, приснотекущий паче слова, яко бо Слово рождшая паче смысла, молю Ти ся, ороси мя благодатию, да зову Ти: радуйся, водо спасительная.

Акафист пред иконой Божией Матери «Живоносный Источник»:

Акафист Пресвятой Богородице в честь иконы Ее Живоносный Источник

Кондак 1

Избранной от всех родов Владычице Богородице, благодатную помощь нам являющей, похвальная восписуем Ти раби Твои; Ты же, яко Преблагая Мати Божия, излей на нас великия и богатыя милости Твоя, недуги наша исцели и скорби утоли, да благодарственно зовем Тебе: Радуйся, Владычице, Живоносный Источник верным изливающая.

Икос 1

Архангел и Ангел множество недоумевают, Тебе, Матерь Бога Слова, на водах землю утвердившаго, разумно хвалити по достоянию. Мы же, Честнейшая Херувим, и Славнейшая без сравнения Серафим, во умилении о Твоих благодеяниих, на нас бывших, дерзаем звати Тебе: Радуйся, Владычице, Богом Отцем избранная. Радуйся, Духом Святым осиянная. Радуйся, рождеством Сына Божия, превознесенная. Радуйся, в женах благословенная. Радуйся, Богородицею величаемая. Радуйся, от всех родов ублажаемая. Радуйся, Владычице, Живоносный Источник верным изливающая.

Кондак 2

Видящи, Премилосердая Мати, слепца, от жажды страждущаго, напоения и исцеления ради в пустыни блуждающаго, источник воды живыя воеводе показала еси; он же благодарственно возопи о Тебе: Аллилуиа.

Икос 2

Разумев воевода Божественный Твой глас, источник воды указующий, и позна его, яко купель Силоамскую, яже не токмо жаждущаго напояет, но и от слепоты того свобождает; мы же милости Твоея, Дево Богородице, ищущии, взываем Тебе сице: Радуйся, Владычице, купель спасения живописующая. Радуйся, слепоту душевную и телесную исцеляющая. Радуйся, разслабленных утверждение. Радуйся, хромых хождение. Радуйся, Мати Света, слепым очи отверзающая. Радуйся, светом истины во тьме седящих озаряющая. Радуйся, Владычице, Живоносный Источник верным изливающая.

Кондак 3

Сила Вышняго осеняет всех, с верою и благоговением притекающих к Живоносному Источнику Твоему, Пречистая Госпоже Владычице. Сего ради силою благодати Его осени и нас, смиренно к Тебе, Богомати, припадающих и молебно о Тебе вопиющих: Аллилуиа.

Икос 3

Имущи богатство милосердия неизреченное, Владычице, всем болящим руку помощи Твоея, недуги врачующия, страсти исцеляющия, в Живоносном Источнице Твоем простираеши. Сего ради вопием Тебе сице: Радуйся, источниче непрестающия радости. Радуйся, чаше неизреченныя благости. Радуйся, сокровище благодати неоскудеваемое. Радуйся, милости у Тебе просящим выну тую подающая. Радуйся, недугов различных исцеление. Радуйся, печалей наших утоление. Радуйся, Владычице, Живоносный Источник верным изливающая.

Кондак 4

Бурею недоумения слепец смущашеся, воды ища жажду утолити. И се, якоже древле, силою Божиею из камене вода источися, тако и ныне в пустыни безводней источник явися; тамо Моисей, источитель воды, зде же Ты Сама, о Богомати, Служительница чудесе; темже молимся: жаждущия души наша благочестия напой водами, да зовем о Тебе: Аллилуиа.

Икос 4

Слыша воевода дивный глас Твой, Мати милосердия, источник воды указующий, во еже жаждущаго напоити и слепоту его исцелити, и сбытие словес Твоих зря, возопи сице: Радуйся, Владычице, страдальцев утешающая. Радуйся, болящих возстановляющая. Радуйся, немым язык благословесен дарующая. Радуйся, всех немощных врачующая. Радуйся, бедствующих поможение. Радуйся, унывающих утешение. Радуйся, Владычице, Живоносный Источник верным изливающая.

Кондак 5

Божественную воду от Живоносного Источника Твоего, токи благодати изливающаго, почерпающе во исцеление недугов душевных и телесных, Дево Богородительнице, благодарственно вопием о Тебе: Аллилуиа.

Икос 5

Видеша людие слепца, водою Живоноснаго Источника Твоего прозревшаго, Богомати, потщашася песньми яко дарами послужити Тебе сице: Радуйся, Владычице, милосердия двери верным отверзающая. Радуйся, надеющихся на Тебе не посрамляющая. Радуйся, бедствующих утешающая. Радуйся, от напастей свобождающая. Радуйся, изнемогающих укрепляющая. Радуйся, Владычице, Живоносный Источник верным изливающая.

Кондак 6

Проповедник чуда Твоего, Мати Божия, бысть воевода, яко дивно слепец водою от Живоноснаго Источника Твоего прозре, сице и нам темныя зеницы душевныя просвети, да благодарственно проповедуем милости Твоя зовуще: Аллилуиа.

Икос 6

Возсия нам Живоносный Источник Твой, Премилосердая Мати, многоразличную благодать Сына Твоего и Бога нашего, Христа Жизнодавца источающий. Сего ради приносим Ти пения сицевая: Радуйся, Владычице, усердная наша Заступнице. Радуйся, храмов Божиих Хранительнице. Радуйся, святых обителей преславная Игумения. Радуйся, в иночестве подвизающихся вразумление. Радуйся, монашествующих в послушании укрепление. Радуйся, всех христиан покрове и защищение. Радуйся, Владычице, Живоносный Источник верным изливающая.

Кондак 7

Хотя благочестивый Лев воевода, царем Тобою, Владычице, нареченный, благодарственная принести Тебе, храм на месте явления Твоего чудесе устрои, Живоносный Источник наименовав оный, да вси, помощи Твоея ищущии зде обретают ю, вопиюще о Тебе: Аллилуиа.

Икос 7

Новая купель Силоамская, паче оныя древния, явися, Пречистая Владычице, храм Твой, в немже покланяемся иконе Живоноснаго Источника, ибо не единою в лето и токмо первее входящим здравие тела подаеши, но выну всякий недуг душевный и телесный врачуеши. Сего ради вопием Тебе: Радуйся, купеле, в нейже скорби наша погружаются. Радуйся, чаше веселия, в нейже печали наша растворяются. Радуйся, каменю, жаждущия жизни напояяй. Радуйся, древо, горькия воды моря житейскаго услаждающее. Радуйся, животворныя воды источниче не истощающийся. Радуйся, бане, греховную скверну совести нашея омывающая. Радуйся, Владычице, Живоносный Источник верным изливающая.

Кондак 8

Странное и преславное чудо явися храм Живоноснаго Источника Твоего, Богородице, в немже жажда духовная и телесная утоляется, и болезньми одержимии исцеляются. Мы же, благодать таковую прославляющее, вопием о Тебе: Аллилуиа.

Икос 8

Всем вся, с верою приходящим к Живоносному Источнику Твоему, подаеши, Премилостивая Госпоже Богородице. О сих всех благодарственно вопием Тебе сице: Радуйся, Владычице, Бесплотнаго воплотившая. Радуйся, страждущих матерей утешение. Радуйся, чад безматерних охранение. Радуйся, юных Наставнице. Радуйся, младенцев воспитание. Радуйся, Владычице, Живоносный Источник верным изливающая.

Кондак 9

Всякое естество Ангельское и человеческое дивится милосердию Твоему, Пресвятая Дево, яко всегда и всем являешися Помощница и Заступница, поющим Тебе: Аллилуиа.

Икос 9

Ветии многовещаннии не могут воспети достойно Живоносный Источник неистощимыя благодати Твоея, ниже изъяснити силу чудес Твоих во исцеление недужных и на всякую пользу душевную и телесную человеком являемую; мы же похвальная восписуем Тебе сице: Радуйся, храме Бога Живаго. Радуйся, жилище Духа Святаго. Радуйся, Ангелов славо. Радуйся, вселенныя державо. Радуйся, мира спасение. Радуйся, Владычице, Живоносный Источник верным изливающая.

Кондак 10

Спасти хотящи вся страждущия, источник жизни явила еси мирови, Пресвятая Богородице, в водах благодати, да вси в скорбех и печалех исцеление и утешение приемля, благодарно зовем о Тебе: Аллилуиа.

Икос 10

Стена и покров в бедах и нуждах помощи Твоея просящим сущи, Владычице мира, Живоносный Источник всем явила еси, да будет от всяких болезней ограждение, в напастех и печалех утешение, вопиющим Ти таковая: Радуйся, Владычице, гордых и строптивых человек усмирение. Радуйся, лукавых и злых намерения пресечение. Радуйся, обидимых заступление. Радуйся, обидящих вразумление. Радуйся, повинных наказание. Радуйся, невинных оправдание. Радуйся, Владычице, Живоносный Источник верным изливающая.

Кондак 11

Пение всеумиленное пред Живоносным Источником Твоим паки и паки приносим Тебе, Богородице, в покаянии зовуще из глубины души: Владычице, приими молитвы раб Твоих и избави нас от всякия скорби и болезни, нужды и печали, да вопием о Тебе Богу: Аллилуиа.

Икос 11

Светозарною свещею сияет в мире лучами благодати Божественный Источник Твой, Пресвятая Богородице, чудесы явленными умы и сердца просвещаяй и наставляяй звати Тебе: Радуйся, Владычице, разумов просвещение. Радуйся, сердец наших очищение. Радуйся, духа обновление. Радуйся, душ освящение. Радуйся, здравия укрепление. Радуйся, Владычице, Живоносный Источник верным изливающая.

Кондак 12

Благодати Твоея Живоносный Источник имуще, Пресвятая Дево, к Тебе прибегаем, яко к нерушимей стене и предстательству: призри благосердием, Пресвятая Богородице, на лютое наше озлобление и исцели душ и телес наших скорби и болезни, да зовем о Тебе Богови: Аллилуиа.

Икос 12

Поюще Твоя чудеса, хвалим и славим Живоносный Источник Твой, Пресвятая Дево, от негоже черпающе токи многоразличныя благодати, величаем Тя похвалы сицевыми: Радуйся, Отроковице Богоизбранная. Радуйся, Невесто Боговенчанная. Радуйся, в женах благословенная. Радуйся, паче горних Сил превознесенная. Радуйся, Престолу Господню выну предстоящая. Радуйся, Заступнице наша, за мир всегда молящаяся. Радуйся, Владычице, Живоносный Источник верным изливающая.

Кондак 13

О Всепетая Мати, Живоносный Источник Твой миру давшая, от негоже изливаеши нам великия и богатыя милости, приими благодарственное сие моление наше, напой нас от источника Твоего в  животе нынешнем и грядущем, да выну зовем о Тебе: Аллилуиа.

(Этот кондак читается трижды, затем икос 1 и кондак 1).

 

Молитва

О Пресвятая Дево, Всемилостивая Госпоже Владычице Богородице, Живоносный Источник Твой, целебные дары на здравие душ и телес наших и на спасение миру точащий, подала еси нам, темже благодарни суще усердно молим Тя, Царице Пресвятая: моли Сына Твоего и Бога нашего дати нам оставление прегрешений и всякой душе скорбящей и озлобленней милость и утешение, и от бед, скорбей и болезней свобождение. Подаждь, Госпоже, (храму сему и) сим людем покровение (и святей обители сей соблюдение), граду сохранение, стране нашей от напастей избавление и ограждение, да мирное зде поживем житие, и в будущем веце сподобимся видети Тебе, Заступницу нашу, во славе Царствия Сына Твоего и Бога нашего, Емуже слава и держава со Отцем и Пресвятым Духом во веки веков. Аминь.

2 ответа на “Акафист

  1. О Пресвятая Дево, Всемилостивая Госпоже Владычице Богородице, Живоносный Источник Твой, целебные дары на здравие душ и телес наших и на спасение миру точащий, подала еси нам, темже благодарни суще усердно молим Тя, Царице Пресвятая: моли Сына Твоего и Бога нашего дати нам оставление прегрешений и всякой душе скорбящей и озлобленней милость и утешение, и от бед, скорбей и болезней свобождение. Подаждь, Госпоже, (храму сему и) сим людем покровение (и святей обители сей соблюдение), граду сохранение, стране нашей от напастей избавление и ограждение, да мирное зде поживем житие, и в будущем веце сподобимся видети Тебе, Заступницу нашу, во славе Царствия Сына Твоего и Бога нашего, Емуже слава и держава со Отцем и Пресвятым Духом во веки веков. Аминь. СПАСИ ВАС ГОСПОДИ!

  2. О божья матерь омой ноги рабы божьей Ираиды, целебной водой из своего источника, дай силы её ногам, чтобы раба божья Ираида смогла встать на свои ноги.

Добавить комментарий

Ваш e-mail не будет опубликован. Обязательные поля помечены *